حكاية مصرية: مركز عالمي للبضائع.. إيه حكاية الاستثمارات الهندية الجديدة في مصر

وزير الاستثمار بيعمل ايه في الهند.. وايه أهم الصفقات اللي تم الإعلان عنها وليه الوزير اختار الهند في زيارته الأخيرة بالتحديد.

وزير الاستثمار المصري المهندس حسن الخطيب  زار في الساعات الأخيرة الهند واجتمع مع كتير من رؤساء الشركات الهندية العملاقة وكمان مع كبار  المسؤولين عن الصناعة والتجارة والاستثمار في الهند.. طيب ليه الهند؟..  عشان ببساطة الهند من الدول الضخمة اقتصاديا في العالم دلوقتي وفيه علاقات تاريخية بين البلدين من أيام عبد الناصر وكمان عشان فيه اتفاقيات كتير  جدا بين مصر والهند دلوقتي لتسهيل حركة التجارة والاستثمار نقدر تستغلها وعشان كمان العلاقات المصرية الهندية تم ترفيعها إلى مستوى الشراكة الاستراتيجية.

وعشان تعرف بعد ترفيع العلاقات الاستراتيجية بين مصر والهند في 2023 خلال زيارة رئيس الوزراء الهندي لمصر كتير من الشركات الهندية جت مصر  لإقامة مشروعات في المنطقة الاقتصادية لقناة السويس وحصل طفرة كبيرة في الاستثمارات الهندية من التاريخ دا..

وبالارقام  مصر ناوية تزيد  حجم التبادل التجاري مع الهند ل3 أضعاف وهتوصل لـ 12 مليار دولار خلال الخمس سنين الجايين مقارنة مع 4.2 مليار دولار في 2024 ودا حسب بيان  وزارة الاستثمار المصرية النهاردة وكمان الوزير المصري أكد على هامش الزيارة إن  الشراكة بين مصر والهند بتثل فرصة واعدة لتعزيز التعاون الاقتصادي في مختلف القطاعات خاصة في مجالات التجارة والصناعة والخدمات اللوجستية وكمان في الاستفادة من الموقع الاستراتيجي لمصر كبوابة للأسواق الأفريقية والأوروبية.. وإن الفرص واعدة بين البلدين للنهضة التجارية بمليارات الدولارات ودا غير الاستثمارات الهندية الضخمة الجاية في قطاع الامونيا والهيدروجين الاخضر والطاقة والصناعة.

وعلى سبيل المثال مجموعة اللولو الهندية أعلنت من شوية أنها بتخطط لزيادة استثماراتها في مصر خلال الفترة الجاية ودا بعد لقاء مسؤولي الشركة الهندية للمهندس حسن الخطيب وزير الاستثمار والتجارة الخارجية.. واكدت الشركة الهندية أن مصر بتعتبر ليهم مركز استراتيجي للتوسع في تجارة السلع الاستهلاكية في المنطقة وإنها البوابة السحرية للأسواق الأفريقية والأوروبية وكمان لان مصر عندها بنية أساسية قوية جدا وحديثة من طرق ومواني ولوجستيات وقناة السويس هتخلبها وسيط قوي في التجارة الدولية ومركز لانتقال وتبادل البضائع دوليا..

مصر تقدر تستفيد من الهند في الصناعات المتقدمة اللي وصلت ليها خاصة الصناعات التكنولوجية والبرمجة والصناعة وغيرها ونجحت فعلا في توطين صناعات هندية مهمة زي صناعة السيارات والأدوية والالات والأدوات المنزلية وغيرها من الصناعات والاستفادة بالمميزات اللي بتوفيرها الاتفاقيات بين البلدين في النفاذ للأسواق الدولية وكمان مصر والهند أعضاء في بريكس وحصلت مفاوضات جادة للتبادل بين البلدين بعملات وطنية أو بعملات بعيدة عن الدولار.. باختصار التعاون مع الهند ممهم جدا ومفتوح وملهوش حدود وهي دولة مهمة في مجموعة العشرين وكمان فيه علاقات نقدر نبني عليها كتير.