يا ترى إيه هو الاحتياطي النقدي، وإيه دوره في دعم الاقتصاد المصري، هل هو مقياس أو مؤشر لقوة الاقتصاد ولا مجرد ظاهرة بتحصل وخلاص، وإزاي البنك المركزي بيقدر يحافظ على احتياطي نقدي محترم ومستدام لمصر.
حاليا، البنك المركزي المصري، بيستعد للإعلان عن قيمة الاحتياطي النقدي الأجنبي لمصر، عن شهر مارس 2025، وهيتم الإعلان الرسمي الأسبوع الجاي.
ولو ماتعرفش، فالاحتياطي النقدي هو مخزون أو حصالة العملات الأجنبية الموجودة عند البنك المركزي، واللي بيقدر من خلالها يتحوط من أي أزمات اقتصادية جاية، ويوفي بالتزاماته.
ونقدر نقول، إن ارتفاع الاحتياطي النقدي الأجنبي لمصر، بيساعدها في التحوط من مخاطر خروج الاستثمارات غير المباشرة فس أدوات الدين واللي هي السندات وأذون الخزانة، واللي بيتم استقطابها بعد رفع أسعار الفايدة وتحريك سعر الصرف، كمان ارتفاع الاحتياطي النقدي بيعتبر من المؤشرات المطمئنة اللي بتوفر الاحتياجات الاستراتيجية والرئيسية للاقتصاد المصرى على المدى القصير.
ولو اتكلمنا بالأرقام، فالاحتياطي النقدي الأجنبي لمصر، ارتفع بنهاية شهر فبراير الماضي، بقيمة 128.3 مليون دولار بالمقارنة بشهر يناير 2025، عشان كده بيعتبر أحد أهم عوامل التأمين ضد الصدمات الخارجية، وبيقدر يعزز من الثقة في الاقتصاد المصري، كمان بيعتبر واحد من أهم المؤشرات اللي بتاخدها وكالات التصنيف الائتماني زي فيتش وموديز في اعتبارها لما تيجي تقيم مخاطر الدول، أو تقيم اقتصادها أو مدى التزامها بسداد ديونها اللي بتكون بالعملات الأجنبية.
وبرضو، من أهم مكاسب ارتفاع الاحتياطي النقدي الأجنبي لمصر، أنه بيعتبر من المؤشرات الإيجابية اللي بتدعم الاقتصاد المصرى بشكل كبير، لأنه بيعزز من موقف التصنيف الائتمانى للاقتصاد زي ما قولنا، وكمان بيساهم في الحفاظ على استقرار العملة المحلية أمام العملات الأجنبية التانية، خاصة في ظل التوترات الجيوسياسية اللي بتشهدها منطقة الشرق الأوسط.
وحاليا، بتتفوق أرصدة الاحتياطي النقدي الأجنبي الحالية لمصر، على مستويات الآمان الدولية، لأنها بتوفر تغطية بتوصل ل 8 شهور من الواردات السلعية لمصر بنهاية شهر فبراير الماضي، عشان كده كان البنك المركزي المصري، أكد أن ارتفاع الاحتياطي النقدي الأجنبي لمصر، بيعتبر إشارة واضحة على نجاح إجراءات الإصلاح النقدي والاقتصادي اللي تم تبنيها مؤخرًا، وبداية تحقق الثمار المرجوة منها.
وبلغة الأرقام، فالاحتياطي النقدي الأجنبي لمصر، قفز عشان يسجل 47.3 في نهاية فبراير 2025، بالمقارنة ب 47.2 مليار دولار في نهاية يناير 2025، كمان واصل تسجيل أرقام تاريخية غير مسبوقة بنهاية شهر فبراير 2025، للشهر الـ 30 على التوالي، عشان يوصل لأعلى مستوى على الإطلاق.
وفي سنة 2024، كان الاحتياطي النقدي الأجنبي لمصر ، شهد نمو كبير في قيمته، وقفز أكثر من 11.8 مليار دولار في الفترة من نهاية يناير 2024 حتى نهاية ديسمبر 2024، وده بيعكس الاستقرار الاقتصادي، وكمان بيعزز من قدرة الدولة على الحفاظ على استقرار سعر الصرف والوفاء بالتزاماتها الدولية، وبيعتبر إشارة إيجابية بتدعم الثقة فى الاقتصاد المصري وبتساهم فى تعزيز مكانته عالميًا.
التعليقات