أيام قليلة والبنك المركزي هيصدر قرار هيهم شريحة كبيرة جدا من عملاء البنوك بخصوص تطبيق انستاباي.. ياتري اية هو القرار ده.. وايه سر أهميته في الوقت الحالي.
خدمات كتيرة بيقدمها البنك المركزي للعملاء والهدف منها الاساسي هو راحة ورفاهية العملاء، وتوفير اكبر قدر لهم من الأمان والسرية علي حساباتهم البنكية، وكمان ضمان معرفة واجراءات العمليات اللي عايزينها بسهولة ويسر، وده من خلال التحول الرقمي للخدمات واللي بقي شعار كامل في الدولة المصرية وكل القطاعات الخدمية بدأت تتجه لتطبيقه في الوقت الحالي.
في الفترة اللي فاتت وضمن خطوات التحول الرقمي اللي بيقوم بيها البنك المركزي، تم إطلاق تطبيق انستاباي واللي قدر في فترة قليلة قوي أنه يكون موجود علي كل تليفون في ايد مواطن مصري، خصوصا أن بيقدم خدمات كتيرة جدا للعملاء كانت بتتطلب مشاوير للبنوك، وحاليا العملاء يقدروا يعملها بكل سهولة ويسر وأمان من خلال تليفوناتهم المحمولة ووصل عدد مستخدمين التطبيق لـ13 مليون مواطن لحد دلوقتي.
طيب ااية هو القرار اللي الشارع المصري في انتظاره في الوقت الحالي واية سبب اهميته؟
مع بداية 2025 البنك المركزي اصدر قرار باستمرار مجانية تطبيق انستاباي ولمدة 3 شهور، والقرار ده هينتهي مع نهاية شهر مارس الجاري، وبالتالي في الفترة اللي جاية البنك هيصدر قرار ياما باستمرار مجانية التطبيق لفترة جديدة وده قرار متوقع جدا يخرج من المسئولين في البنك المركزي كخطوة جديدة لزيارة اقبال العملاء علي استخدام التطبيق واجراء المعاملات المالية من خلاله.
مصادر مطلعة بالبنك المركزي قالت أنه هيتم اصدار قرار بمجانية التطبيق لفترة جديدة هتوصل لـ3 شهور، والفترة دي هتبدأ من الأول من ابريل المقبل ولحد نهاية شهر يونيو، وان تطبيق اي رسوم علي التطبيق غير مطروح تماما في الوقت الحالي خصوصا أن البنك المركزي لسه لحد الأن بيجري عمليات تقنية هدفها زيادة الأمان والسرية علي المعاملات المالية للعملاء واللي هدفها الوصول بصفر اخطاء في عمليات التحويل والدفع .
طيب المعاملات المالية اللي يقدر العيمل يقوم بيها من خلال التطبيق بتوصل لكام؟.
البنك المركزي في الفترة اللي فاتت حدد حدود المعاملات المالية من خلال التطبيق وبيوصل الحد الأقصى للتحويل لقيمة المعاملة الواحدة 70 ألف جنيه والحد الأقصى لإجمالى المعاملات اليومية فى التحويل 120 ألف جنيه والحد الأقصى للمعاملات الشهرية للتحويل 400 ألف جنيه.
التعليقات